當年在《網中人》食漢堡包食出位的阿燦廖偉雄，近日在YouTube狂上載潮文短片而再度成為網絡紅人，燦神變潮燦。雖然過去10年，阿燦走到內地搞有機農場，但對演藝工作，他仍有一團火，除稍後演出音樂劇《那年五月》外，明年更會舉行《笑聲救地球》25周年再放笑彈。
57歲的阿燦演過新移民，也扮過不少經典人物，但最為網民注目的，還是他在《笑聲救地球》環節「乜太與你」扮演的乜太。當日，阿燦一身白恤衫西褲現身受訪。問可同意網民覺得齊昕母親似足乜太？阿燦笑笑口說：「每個人有每個人想法，自己控制唔到，乜太喺我心目中只係個乜太。至於話似邊個邊個？呢啲係每個人代入㗎啫。我唔知呀，你哋去諗啦！」
再問阿燦當年如何打造乜太形象？他說：「呢個item係講一個女人去煮特別嘅餸，作為演員只能賦予個角色生命，我揸住兩樣嘢去做，呢個女人表面好大方得體斯文，但佢係個好霸道女人，佢唔希望對手搶佢鏡，所以小李（胡大為飾）有啲乜嘢，乜太就會扑佢。」
對近年自由行搶奶粉、走水貨、小童隨街便溺等引爆中港矛盾，阿燦說：「我冇任何黨派，我只係一個普通香港人，咁大地方，有唔同嘅人，一定有唔同嘅問題發生。我自己嘅做法係去到每一個地方都盡量融入當地社會、文化，同大家一齊去溝通，香港人有時做嘢好急，希望一日可以改變晒所有嘢，但其實每樣嘢都需要時間。」
做雞都要做好崗位
阿燦其貌不揚，不是周潤發也不是林峯，卻可以當上男主角，阿燦認為自己個案正好給年輕人一個希望，他說：「我係有啲醜樣，一個冇學歷，貌不驚人嘅後生仔，從一個小角色去做到主角，個經歷話畀好多人聽，唔使埋怨嘅！我從來冇埋怨自己唔靚仔，我入訓練班時同周梁淑怡講，唔一定要做演員，你畀我推車軌都得，我只係鍾意呢行。後尾畀我做咗演員，我都冇諗過要做主角，只係諗每一日做好每日嘅嘢。」
阿燦續說：「靚人唔一定做到主角，佢哋唔記得自己係演員，只係成日埋怨『點解唔畀我做主角？點解唔畀周潤發襯我？點解要book我做雞？唔做！打死都唔做。』你唔做，即係冇一個平台表現自己，咁我又點再搵你做第二樣嘢？我做一隻好嘅雞、出色嘅雞，自不然會有人搵我做鴨，自然又會有人搵我做另一樣，只要你喺自己行業做好工作崗位，再吸收經驗，提高自己能力，你一定會成功。」
採訪：戴彩煥