對好多人嚟講，賭馬嘅樂趣，就係簡簡單單買一隻獨贏，都可能有唔錯嘅回報，三幾十倍嘅冷W周不時出現，過百倍大冷馬跑出，亦唔係太罕見。唔似得六合彩，雖然買十蚊可能贏幾千萬，但只係鏡花水月，99.99%嘅市民，一世人甚至下一世，都中唔到一次六合彩頭獎！
上季最冷嘅頭馬喺2月出現，高伯新馬房「福毅」在港初出，近乎冇人睇好，結果呢匹1200磅大馬唔使熱身下，一早彈出領放，而且直路越騎越有，就咁大勝三馬位，獨贏每十蚊派1,172蚊，夠晒誇張。不過比起2001年「百勝福星」派3100幾蚊嘅香港紀錄，仍有一段距離。
睇番「福毅」爆完大冷後再出跑第二，跟住兩場則贏晒，在港四戰三冠一亞好威水，潛質肯定有餘未盡。不過大家咪以為呢啲大冷頭馬，一定前途無限。上季有14匹馬50倍或以上勝出，翌仗只得「吉利高」能連捷，另有三隻包括「福毅」跑二三名位置，其餘10隻翌仗走樣三甲不入，所以啲人話「唔好追寶尾」，的確係有道理嘅！