鄭欣宜有個「開心果」媽咪（肥姐沈殿霞），自幼被寵愛得如珠如寶，因為無風無浪，當入行後面對排山倒海的壓力，欣宜不幸迫出抑鬱症。幸好最終釋放自己，豁出去「真我」示眾，尤其來個現實版肥妹大翻身，絕地逢生，反而獲支持，開心欣宜已下定決心接亡母棒，為觀眾無限放送笑彈。
撰文：比華利
鄭欣宜挾星二代之名闖娛圈，是利？是弊？有着星爸媽鄭少秋和沈殿霞的知名度，27年前呱呱墮地已注定她成追訪目標，高峯期體重有230磅。肥胖讓欣宜承受壓力，03年地獄式減100磅贅肉，成就瘦身神話，隨後欣宜以「肥姐愛女」之名不時現身幕前。08年肥姐病逝，欣宜才正式出道。三年後推出處女碟，同年底音樂頒獎禮囊括所有新人獎，驚喜卻變成悲哀，她日前接受專訪時，默認一堆獎項引爆了抑鬱症。
瘦身神話好大壓力
欣宜最怕被指是「瘦身神話」，她說：「我最怕大家套咗個角色入我身上，乜嘢減肥偶像，好大壓力，好怕大家望住我人生做例子，我真係擔當唔起呢個責任，我嘅家庭背景，令我細細個喺大家目光底下成長，有時我錯咗就會被放大，所以我成日提住自己唔可以畀人入到位，咁樣就崩潰。」
外形和言行被批判，金魚缸下生活，痛失至親等，導致欣宜壓力爆煲，即使音樂頒獎禮連番捧獎都無補於事，她說：「工作上幾成功，返到屋企冇人同我慶祝，感覺都冇意思。」獎座硬推欣宜向前，令她對自己要求更高：「得獎之後，我成日困住自己，不停學嘢求進步，呢段期間冇出過去同朋友食過一餐飯，整個人喺緊張狀態，大時大節又收埋自己，朋友開始擔心我。」從欣宜形容的情況看來，她當時明顯患上抑鬱症，她沒否認：「唔使講到咁清楚，哈哈哈。」釋懷的欣宜選擇笑着默認。
繼承母親做開心果
這幾年兜兜轉轉，欣宜認為真我面對觀眾才最舒服，不但任身形翻脹，還不停為肥人發聲，早前還在facebook撰文剖白減肥血淚史：「咁樣先最舒服，𠵱家我好似揼低咗個包袱。香港女藝人唔係行好pure，就行性感，我兩條路都走唔到，我唔介意殺出一條『肥』路。facebook嗰篇文章，完全發自內心，只係真心對人對事，先至得到大家認同。」
畢竟欣宜流着「開心果」肥姐的血，骨子裏的她果然笑聲滿載，欣宜舉手投足流露着亡母影子，她認同：「我都覺自己性格同語氣，越大越似媽咪。」欣宜也期望可接棒做「開心果」：「我知媽咪承受好多壓力，佢唔同人分享，佢有使命帶歡樂畀大家，我都想似佢。」欣宜續說：「當年我好多負面報道，我有勁喊，媽咪安慰我呢個世界，一百個人無可能一百個人都鍾意你，唯一可以做到係爭氣，將每件事做好。我𠵱家學識，批評不論好與差，我全部睇晒，藝人等於一個產品，一定要睇用家評語先可以改善，如果人哋擺明要攻擊你，嗰日EQ高，睇完咪笑一笑。」周身正能量的欣宜已視藝人為終身職業，她說：「我打算做到70歲都當自己係新人，唔想有限制，希望到時我可以揀job做就叻女。」
