外表不羈的組合Soler細孖Dino，已為人夫兼育有20個月大囝囝Damiano，一頭鬈髮的Damiano遺傳爸爸的混血靚仔樣，趣致可愛，為了囝囝健康成長，兩夫婦有空就帶心肝寶貝去游水，Dino還做人肉浮床，讓兒子享受在水中央的樂趣。
撰文：余燕儀
混血歌手Dino和老婆黃麗施（Nancy）結婚5年，兩人育有寶貝仔Damiano，搖身變慈父的他湊仔為樂，有空就帶囝囝與陽光玩遊戲，閒來到泳池戲水外，周末就到南丫島暢泳，Dino說：「好開心日日對住佢，帶好多歡樂畀我哋，佢活潑又聽話，好鍾意游水，我哋買咗吹氣泳池仔擺喺屋企騎樓，畀佢日日玩15分鐘曬吓太陽。」
Damiano石沉水底
問未滿兩歲的Damiano驚水嗎？Dino說：「第一次落水有啲怯怯哋，海水見唔到底，抱實佢就冇事，BB池就畀佢企喺度，大池唔夠膽，試過抱住佢游，佢好似一嚿石咁沉落水底，嚇死我，幾乎想叫救生員救佢。」Dino搞笑說：「佢好似非洲人咁骨架好重，非洲好少人游水叻，不過我又唔會擔心佢學唔識，始終佢夠大力，踢多幾吓就會游到。」
「佢好怕醜唔出聲」
Dino教囝囝游水原來別有用心，他說：「希望佢學識游水同曬多啲太陽，我哋揀12點前曬半粒鐘，唔會好熱，小朋友唔曬太陽，免疫能力冇咁強，曬多啲太陽健康都好啲，佢出世到𠵱家都未病過，只係出牙時有少少流鼻水，但唔超過一日就好番。」問會否安排囝囝報讀暑期班？他說：「冇，佢仲咁細個，只係喺屋企畫畫、睇書，佢鍾意聽故事，不過佢好怕醜，唔出聲講嘢，叫佢講嘢就擘大口望住我，我哋喺屋企會講英文，見到朋友就講中文，令佢兩種語言都接觸到。」
教仔贏在起跑線？多餘！
雖然現今有父母的教仔目標是「贏在起跑線」，但Dino卻另有一套理念：「呢個係多餘，人生兜兜轉轉，唔係起步決定命運，學業係每個人嘅責任，未來冇人知，父母唔使緊張，如果10年後社會上農夫大晒，係咪要仔女學種植呢？如果經濟再差落去，我都可能走去耕田，𠵱家囝囝鍾意踢波、跳舞、唱歌，樣樣都畀佢試吓，活動係想佢身體健康，最緊要做人有禮貌，識關懷人。」
