前幾日陶傑講「拿美國人的錢」，寫得幾過癮，最近因為黎智英捐錢俾泛民事件，引起左派大罵「拿美國人的錢」，似乎邊一個攞過美國人的錢，就係十惡不赦，拿錢的人幾乎就等於「通番賣國，出賣本土利益，反中亂港」。左派陣營內其實有不少文筆卓越、滿腹經綸之人，但唔知點解，「知識分子」一加入「親共左派陣營」，就會變成「識字分子」，只懂得服從，識得聽話，願意跟隨上頭嘅宣傳指揮棒，去東去西，完全服從命令，如蜀犬吠日，外人旁觀，都幾好笑。
上星期明報有文章介紹一本新書「香港文化眾聲道」，文內提及多人，都係新亞書院早期校友，於是在星期一就去咗中環三聯書局買咗本書（盧瑋鑾、熊志琴編著）。三聯係老牌左派書局，但為了生存與交得起租金，內裏出售嘅書本十分大紋大路，無政治審查，連本土派陳雲、反動派吳志森，加埋周保松教授嘅書都擺放在地下門市當眼處，可見得三聯都幾信奉市場導向，如果淨係賣老左派政治正確嘅書籍，點可以在中環生存呀。
碰啱陳雲與吳志森與周保松都係新亞校友，新亞嘅校風都幾獨特，出咗不少思維光譜完全不同之人，例如與上述三人不同思想嘅就有張志剛、麥美娟、鄧家彪。翻開「香港文化眾聲道」，知道呢本係口述歷史類，盧瑋鑾大師姐（小思，新亞64）歷年來為紀錄、傳承香港文化文學史，花了不少工夫，呢本書訪問咗幾位與「友聯機構」有關嘅前輩，何振亞、奚會璋（新亞經濟53）、古梅（新亞經濟55）、孫述宇（新亞外文58）、王健武（新亞經濟56）、林悅恒、胡菊人（太太劉美美係新亞哲學系校友）與戴天，主要口述內容係1950-1970年代在友聯機構工作嘅歷史，佢地一致證實友聯拿美國亞洲基金（Asia Foundation）的錢，開辦了友聯出版社、友聯書局、兒童樂園、大學生活、中國學生周報、祖國月刊等等，影響香港戰後兩代大學生、中學生嘅刊物。時下香港學者呂大樂等社會學家為香港尋根，講文化源流，其實左丁山以私人經驗講，香港1950至1980年間嘅流行文化、學術文化都受上述報刊及其作者所影響，1990年以後，先至由「壹週刊」改變媒體生態，扭轉局面。即是話，美國人的錢為香港文化播下種子，其實是好事一宗。當年美國錢支持友聯，美新處辦今日世界出版社，人才輩出，拿過薪水嘅就有鄒文懷、李如桐、余也魯、戴天、董橋、胡菊人、金炳興、林以亮（宋淇）、岑逸飛等，可說粒粒皆星，拿北京錢嘅《青年樂園》，邊有得比呀。