雖然男歡女愛冇話邊個啱同錯，不過好似北愛高球手麥艾萊（圖）咁，分咗手之後仲話前度禾絲妮雅琪陀衰家，就認真冇品。事緣原本會喺今年年尾同禾琪結婚嘅麥艾萊，喺5月中時突然單方面宣佈分手；之後麥艾萊喺高球場嘅成績就蒸蒸日上，喺現正舉行嘅PGA錦標賽，經過兩日賽事後，佢就以133桿領先。喺上周五賽後，麥艾萊開口話：「飛咗禾琪之後，我全副精神擺晒落高球度，所以成績好咗好多。」其實你唔講，人哋都睇到啦！又何苦要咁冇品呢？至於禾琪就慘啦，喺上周五嘅蒙特利爾女網賽啱啱輸咗俾細威，8強出局。
另外，同樣有參加PGA錦標賽嘅美國名將老虎活士，就繼續表現沉淪，兩回合合共以148桿出局。