自幼在破碎家庭成長，慶幸沒對欣宜留下童年陰影，相反她還憧憬將來可以建立幸福家庭。熱戀中，有位潮流雜誌攝影師男友Silas Lee錫到燶的欣宜，心中已有生BB計劃，27歲的她說：「我唔想做高齡產婦，我想大約35歲左右生，仲想自己有能力湊得郁，帶BB去公園踩單車、滑雪同去沙灘。」即使在外國長大，但欣宜思想非常傳統，她堅持婚後肚皮才開工：「我要step by step。」
欣宜的家庭計劃，三個先夠數，她說：「我嘅計劃係生一個，領養一個，再生一個。」身為獨女的欣宜愛熱鬧，她說：「我8個月時爸爸媽咪分開，我跟媽咪生活，媽咪唔舒服嘅時候，佢冇一個男人喺身邊照顧，好彩我可以陪伴喺度，如果唔係佢真係得一個人，令我更加明白，男女感情較容易分開，相對親情血濃於水，呢啲就係骨肉關係。」
【秉承肥姐守時之習】
沈殿霞肥姐出名守時，拍檔遲到必被鬧爆，連寶貝女欣宜都沒有例外，訪問當日見證了欣宜守時習慣，她說：「我細個試過遲到，俾媽咪鬧我冇時間觀念，自此唔敢再遲。」到底欣宜有甚麼妙計堅持守時習慣？她說：「我會較最少三個鬧鐘，每個都較快15分鐘，我會由起身、梳洗、化妝到出門口都會set唔同時間，鬧鐘會定時響鬧提示，咁我每part都唔遲啦。」
養成守時習慣後，欣宜一旦遲到反而陣腳大亂：「我一遲到咗就會好𤷪𤺧，好怕連累同我合作嘅人，只要我準時出到門口，跳上的士，咁嗰日乜嘢都會好順㗎啦。」