喺祖家南非探親後返港的練馬師霍利時，呢一日(9日)露面督操，觀察旗下馬「興趣」、「帝國勇將」等駒踱步嘅情況。霍利時之後公佈一個喜訊，就係廐內新星「金獅福將」腳部手術成功，已大致完全康復，而且今季復操以來，進度仲好理想。
「金獅福將」上季一戰新馬賽即勝，盡顯質素，可惜賽後發現右前腳腕骨骨裂，兩日後接受內窺鏡手術要安裝螺絲。霍利時話「金獅福將」潛質優厚，馬主香港木球會團體兩位成員David Garcia及保良局總理陳正欣係佢好朋友，早幾年即使時廐處於低潮，佢哋都對霍利時不離不棄。所以當「金獅福將」最初受重傷時，霍利時曾經好唔開心同擔心，驚木球會團體同埋馬房失去一匹良駒。幸好「金獅福將」手術成功，霍利時感謝獸醫幫助，又話返港後有睇佢操練，明顯走來暢順，完全康復，應該冇乜後遺症。
霍利時進一步指出，「金獅福將」上季平磅下輕取「牛精叻仔」獲勝，後駒其後攞到三冠一季佳績，已加至80分水平，而「金獅福將」現時只65分，所以今季至少兩捷，已經係最保守嘅預測。