曼聯「7小福」其中5福：傑斯、史高斯、畢特同尼維利兄弟，退休之後就搞作多多，最新力作就係搞波，𠵱家就搞緊支半職業球隊沙福城（Salford City F.C.）。為咗幫沙福城宣傳兼籌募經費，周四呢5位班主就牽頭，搵埋班昔日隊友組成92代聯隊（Class of '92），親身落場同沙福城踢番場友誼賽，不過沙福城球員對住班老闆就冇面畀，以5:1大勝，好彩92代仲有傑斯破蛋，叫做挽回多少面子。
傑斯入12碼照輸1:5
憑住傑斯、史高斯等等一代紅魔鬼球星嘅名氣，周四喺曼市附近AJ貝爾球場舉行嘅92代聯隊對沙福城友賽，都吸引到12,000人入場。呢班沙福城班主都碌晒人情卡，好似搵到轉投昆士柏流浪嘅里奧費迪南做92代聯隊助教，舊隊友好似門將雲尼古、翼鋒科東尼、後衞施維斯達等都嚟到撐場，不過仲好似傑斯仔咁「弗」嘅名宿就唔多，好多個都孭住個大肚腩比賽。
沙福城雖然只係半職業，𠵱家踢緊英格蘭北地區聯賽，連職業聯賽都未入到，但都仲夠力數呢班老鬼，好彩傑斯射入12碼，幫92代破蛋，不過沙福城仍然以5:1大勝。呢場友賽唔單止入波多，入場球迷亦都夠晒熱情，頻頻有人衝入球場，拎簽名又有，攬住門楣又有，仲開心過嘉年華。
史高斯再插朗尼回塘
曼聯新一季由雲高爾接任領隊，季初熱身賽頻頻報捷，連歐聯冠軍皇馬都唔係佢哋手腳，紅魔迷對呢位新帥都好滿意，不過史高斯始終覺得都係傑斯最好。史高斯喺呢場友賽賽後就話，如果傑斯上季尾接手暫代領隊後4場比賽贏得晒，曼聯會搵佢坐正，傑斯領軍能力出色，幾年後會成為出色領隊。39歲嘅史高斯更加老馬有火，插曼聯前鋒朗尼已經過咗高峯，仲話自己出任講波佬後，以後講曼聯波都唔會留手，有咩衰嘢一樣狂插。