周潤發、劉嘉玲、張家輝和余文樂昨日在將軍澳出席電影《賭城風雲2》的記者會，身穿低胸紅色連身褲出席的劉嘉玲，與身形甚fit的發哥站在一起，輕易成為全場焦點。發哥在電影上將會有一場泰拳戲，於是他專登用了四、五個月去鍛煉身體，向來搞笑的發哥，提到家輝在《激戰》的演出，他笑笑口說：「我企喺隔籬覺得自己好似發育唔健全，好彩得佢指點。」接着發哥突然對着家輝下跪說：「張師傅，請受徒弟一拜！」嚇得家輝亦急急下跪，亦令站在中間的嘉玲不知所措，場面認真搞笑。
成枝香檳飲晒
發哥透露大隊已經完成在泰國的拍攝戲份，他更稱此行令他覺得開心、溫馨又刺激，尤其是與嘉玲相隔多年後再度合作，兩人頗回味當中的激吻戲。事後發哥受訪說：「呢場戲第一次咀係溫馨浪漫，第二次咀係苦澀，第三次就唔好再講，不過都好好咀。」他還笑說：「導演好好心思買咗枝2千幾蚊嘅香檳，擺咗喺沙灘，點知嘉玲成枝飲晒，我一滴都冇飲過，不過我都好多謝佢冇退休，我未來嗰10幾年再做小生要靠佢！」在旁的嘉玲更笑說：「我細細個已經迷戀發哥，廿幾年前都冇機會錫佢，今次難得有3個機會錫佢！」發哥聽聞後禁不住說：「梁太太，你結咗婚喇，唔好講呢啲說話好唔好？」
此外，憑內地真人騷《爸爸去哪兒》而爆紅的王詩齡（Angela）亦有份參與演出，對於戲中的危險戲份由另一小女孩替身頂上，結果被網民炮轟，為此監製王晶說：「我覺得網絡上有好多為黑而黑嘅人，基本上大家知道我哋係專業咁做緊啲專業嘅事情，Angela同埋嗰個9歲替身小女孩，我哋都提供咗好好嘅保護，大家都唔會受傷。」
撰文：唐芯悠