放暑假，唔少政界同社運界人士都趁機外遊。社記吳文遠都唔例外啦，佢繼上周去英國出席細佬婚禮外，話咁快就轉飛埃及開羅，開會兼暢遊。而呢兩次行程嘅賣點就係有美相伴，羨煞旁人。邊個伴佢同遊？之唔係有社運女神之稱嘅周澄囉。有人噚日係facebook晒命話：「在開羅的第一天，開完成日會，黃昏就去尼羅河畔拍拖拖。」
有網民睇完佢哋拍拖相就覺得「吳文遠好似瘦了，周澄好似肥了」。文遠就話，走在埃及街頭，深深感受到平民百姓嘅生活苦況。喺解放廣場一帶，軍隊武力鎮壓痕迹仍隨處可見，睇到埃及人爭民主嘅「戰迹」，令佢又諗番香港，面對唔講道理嘅政權、無賴政客，香港人真係要諗諗，為自由，可以準備付出幾多，犧牲幾多？嘩！乜拍緊拖都變得咁沉重呀！