星級基金經理陸東噚晚喺一個收費財經講座做主講者，入場券每張正價300元，現場接近700個座位幾近爆滿。除咗股市，現場觀眾最關心就係佢對樓市嘅睇法，陸東亦趁機笠頂高帽畀金管局前總裁任志剛，認同任總所講，香港人至少要有一個自住單位。
陸東主動重提舊年預測樓市兩年跌五成嘅預測，係基於失業率、利率一併上升，加埋金管局按揭成數限制持續，跌三、四成真係唔難。佢強調，樓價「未必bomb一聲就跌，總之下跌風險一定大過上升，但幾時跌、跌幾多，我都答唔到。」佢又爆料，指舊年每呎建築成本其實唔夠2,000元，「但有啲城中富豪話要4,000蚊，係因為深水埗樓當深水灣賣，九龍城當九龍塘賣，係貴喺豪宅配套度」。
講得㷫起，陸東話好佩服任總，指任總早前關於香港人至少要有一層樓嘅講法，佢都好認同，「你要喺香港搵食、交稅，但又冇物業，就等於沽空香港。當香港係屋企，就一定要盡快有自置物業，亦唔好因為樓市波動而手痕沽咗層樓，因為多數瀨嘢。」
結論就係叫大家唔好炒樓，上車就要快嘞。