韋比周三突然宣佈「掛雞」，來季英超唔會再見到佢，但似乎球迷唔單止冇留戀呢位英格蘭名哨，仲「抽水」插佢執法生涯成日偏幫曼聯，網上出現咗好多惡搞圖。有張係網民特登喺奧脫福球場門外費格遜嘅銅像隔籬，為佢豎立咗個差唔多嘅銅像（上圖）；
另外，仲有網民將韋比一張同老婆仔女影嘅全家福相，改晒佢一家人變成費格遜嘅樣（下圖），一樣夠晒頂癮。
不過，根據英國體育數據網站《Opta》作出嘅統計，其實近年喺佢執法之下最受惠嘅球隊，並唔係曼聯，反而係同市嘅曼城。由09年起，佢執法咗曼城17場聯賽，隊波攞到41分，比起曼聯20場得37分仲多，不過呢啲數字上嘅統計，當然唔夠球迷親眼見咁真實啦！