你做初一，我做十五！針對歐美早前實施更多制裁，俄羅斯總統普京禮尚往來，本周宣佈禁止制裁國食品進口，連飛機亦可能唔畀過境，加上市傳大量俄軍重新集結喺烏克蘭邊境，令市場擔心黑海烽煙再起，歐美股市近日就被祭旗，當中以德國傷得最重，DAX指數輾轉間較高位回落10%進入調整市，而早前勇創萬七嘅道指亦回試16400，散水意味變重，相信係聯儲局加息陰霾下，大市唔易發圍。
非美唔爭氣 美金續發圍
相反，受惠炒加息及避險資金，美元繼續受到追捧，美滙指數攀上近一年高位，加上其他非美貨幣國家唔爭氣，例如受到意大利衰退和通縮威脅夾擊，歐元已跌至1.33美元創九個月低位，而英國對幾時加息又態度曖昧，加上IMF指幣值過高，英鎊落返去1.68美元邊。歐洲央行昨日議息後按兵不動，聚焦德拉吉言論，執筆時未有結果。
以袋鼠國為例，噚日公佈上月失業率由6月的6%，升到6.4%嘅12年高位，跟市場估計不變大跌眼鏡，令人憂慮當地息口係咪真係見底，加上美金勢強，澳元昨日曾跌近1%，落返92美仙水平。
值得注意嘅係，澳洲經濟最大靠山中國嘅經濟尚算硬淨，雖然對袋鼠國經濟有利，但英美失業率徐徐向下之際，澳洲失業率卻逆流而上，家陣仲高過山姆大叔嘅6.2%，是2007年以來首趟，令人擔心冇咗礦業高增長呢支大旗，該國十年盛世係咪已經埋緊單。事實上，全球最大礦業公司必和必拓，6月就擬裁減最多3,000名鐵礦石業務員工。難怪澳洲央行阿頭斯蒂文斯本月議息後，亦埋怨礦業冇之前咁好景，希望澳元貶值下刺激經濟。
美元是否確認轉勢言之尚早，但近期地緣政治風險升溫下，理應得米的金市卻彈極不起，予人英雄遲暮的感覺。金價經過去年大跌近三成後，雖然今年反彈約9%，但近日仍喺每盎斯1,300美元掙扎，對比2月尾烏克蘭爆發危機時幾乎原地踏步，情況同兩年多前每逢環球出現戰亂或經濟壞消息，金價就生龍活虎的情況明顯有別。
物以罕為貴，此乃黃金能古往今來四海通行的原因，問題是正如股神畢菲特一直強調，揸金冇息收，加上一如其他資產，金價近年亦被歐美量寬催谷下升個不亦「落」乎，現價恐有不少水份。眼見美國經濟及通脹雄風乍現，儲局鷹派近日又裝兇作勢，隨着儲局加息在望，幾年前被國際大鱷索羅斯形容為終極泡沫的金價，除非環球出現高通脹或世界大亂（個別地區唔算），吸引力難與有息收的貨幣相提並論，前景如何應有數得計。
奇兵
本欄逢周五刊登