港股近期氣勢如虹，臨近10月滬港通正式開車，耀才（1428）主席葉茂林噚日喺股東會後講起滬港通都信心爆棚，直情形容滬港通係「大時代」嘅來臨。照咁睇，葉茂林可能係三色台嗰套經典劇集《大時代》嘅粉絲喎，否則點會咁亢奮!
佢話內地有成十億人，相信未來生意同盈利都會翻幾番，「我自己都估計唔到會翻幾番，有機會五番、十番、二十番」。佢又神神秘秘咁話，公司已經佈下天羅地網迎接滬港通，不過就天機不可洩漏，怕俾其他競爭對手知道，詳情喺10月15日先公佈。點解呢日講呢？唔通葉茂林收到風，知道滬港通邊日開通？對於最近有上市證券行傳賣盤，葉茂林就將耀才比喻為自己個女，大讚「啱啱18歲，咁靚，我都唔捨得賣住」，又話公司仲有大把發展潛力云云。