狼王路夫過騎士其實係公開嘅秘密，大家都等緊24號官方落實。周四有消息人士爆料，騎士已經確定用兩位狀元A域堅斯、班尼特同埋下年1個首輪選秀權，同木狼交換路夫。據講路夫幫騎士打完1季就會跳出合同，之後再同騎士簽5年總值超過1.2億美元（約9.3億港元）嘅新合約㖭。路夫嘅「準隊友」勒邦占士，周五就會出席喺阿克朗大學球場舉行嘅盛大歡迎會。