電盈（008）主席李澤楷嘅恤衫加西褲應該已經係IT look嘅典範，不過時裝與科技一樣，都要與時並進，最新而又可以吸引到創投基金畀錢嘅IT look，可能係要着衞衣、T恤同埋膠底波鞋。
causal夠自信兼獨立
早期投資facebook與LinkedIn而賺大錢嘅星級創投基金老闆Peter Thiel，最近推出新書《Zero to One》向科技新丁教路，其中一點，佢竟然係教科技新丁應該點樣着衫。原來佢揀公司投資，係有一個特殊偏好，如果科技始創公司嘅行政總裁（CEO）着西裝嘅話，就一定唔揀㗎。
佢話，如果佢旗下創投基金嘅同事肯多花時間研究每間科技始創公司嘅技術，可能都可以減低投資錯誤嘅機會，但原來唔使搞咁多嘢，直接睇公司嘅CEO着乜已經可以令佢哋更快睇到真相。
根據《經濟學人》網上文章所講，𠵱家喺矽谷，着衞衣、T恤同埋膠底波鞋先至型，唔單止係舒服、方便咁簡單，咁樣着，仲係代表專業同埋有能力，夠自信着得causal嘅人被視為更加獨立、有能力同埋具有創意，唔使靠老西去增加自信，並且將焦點集中喺產品同埋生意。
另外仲有一個講法，就係話𠵱家喺商業世界，成功唔係靠睇落有錢，而係要睇落與別不同。
唔怪得小米創辦人雷軍、百度靚仔老闆李彥宏好多時都係就咁着T恤、西褲就見人喇，facebook創辦人朱克伯格更加唔使講，經常都係大學生look。
李華華
mailto:[email protected]