近日《人民日報》話A股市場最壞時候過去，新華社則話A股回暖引領資金回流。係人都知中國乜嘢都政策主導，官媒出嚟唱雙簧，反映已去到好急嘅地步，但急乜嘢？中國經濟嘅逼切問題，係美國明年好大機會開始加息，但內地經濟卻走緊下坡，美國一旦加息，歐洲又幫拖壓歐元落去，美滙抽上；而內地經濟下行，唔好話加息，唔減息已偷笑，咁情況下好容易會令資金外流離開中國。當務之急就係唔郁央行利率前提下，盡量將街外嘅借錢利率降低，亦即壓低融資成本。
利息係資金嘅成本，中國因金融制度落後同A股個場被玩謝，股市融資渠道斷纜，借貸集中晒銀行體系，利率就會偏高，具體可睇返早前本欄「A股勿睇得太淡」一文。故搞番旺A股個場係必然做法，恢復股市融資功能可減輕央行減息壓力。近期央行推抵押補充貸款同定向降準亦都係指定領域內壓低融資成本，但盡量唔郁宏觀貨幣政策。根據EPFR統計，上周有21億美元流入內地股市，創2012年底以來最大單周淨流入量，加上早前MSCI唔肯納入A股，即係外資未收夠籌。今次呢波外資流入如果持續長時間，就可以確定A股見底。
Mr. Tregunter
本欄逢周五刊出
註：作者為《地利根德閣》blogger，著作有《樓市撈底攻略》