【五星迎殘運】劉德華任香港殘疾人奥委會暨傷殘人士體育總會副會長，為推動更多人支持於10月在韓國仁川參加「2014仁川亞洲殘疾人運動會」的香港殘障運動員，他邀請五位香港紅星幫手，與香港殘奧會代表切磋交流及拍攝短片。第一波是小時曾代表學校乒乓球隊的張家輝，與乒乓球隊成員李銘業打友誼波滿足波癮，華仔亦親力親為，到現場探班打氣。
撰文：文國駿
張家輝與香港殘奧會乒乓球代表隊成員李銘業，日前於沙田體育學院拍攝宣傳短片，家輝雖與銘業第一次見面，但很快已老友鬼鬼，家輝更叫銘業不用就住打：「得㗎喇，你大大力殺埋嚟啦！」家輝自爆以前是乒乓球校隊成員之一，他說：「第一次接觸乒乓球都係喺屋邨下面嘅石乒乓球枱，成日贏㗎，之後俾阿Sir揀咗入校隊，不過當然係冇乜受正式訓練嗰啲，打天才波啦。」談到剛才跟家輝的「激戰」，銘業大讚對方很有天份，他說：「佢打嘅波好有力，好明顯以前有打開。」
單手發球感同身受
曾中風的銘業左手仍未很靈活，所以他開球時要用右手拋波發球，家輝說：「頭先喺導演要求下試過單手拋波發球，要發到球唔難，但要喺競賽情況下發到個好球就好難，感受到銘業當年開始嘅難處，更加敬佩佢嘅意志。」問到家輝有否最接近運動員的艱辛經歷？他表示：「其實嗰陣拍《激戰》我都當咗自己係運動員，訓練強度真係冇乜分別。我覺得我同銘業都有少少相似嘅地方，我嗰陣訓練咗一輪後斷手指，我都好怕之前訓練會化為烏有，咪惟有堅持囉，我相信銘業都係一樣。」
劉德華碌盡人情卡
拍攝途中，劉德華一身便裝到現場探班，令到一班工作人員及銘業精神為之一振，而他跟家輝也同在銘業的乒乓球拍上簽名留念。華仔接受訪問時談到這次拍攝計劃，他說：「其實有呢個念頭好耐，因為講到殘疾運動員，香港人多數只係認識蘇樺偉，但其實仲有好多好努力嘅運動員係需要我哋支持同鼓勵。」問到華仔是否碌盡人情卡邀請五位紅星（張家輝、鄭秀文、楊千嬅、鄭伊健、余文樂）拍攝？華仔謙稱：「唔係我碌㗎，好多謝幾位藝人咁有心參與，我只係負責嚟say hello咋！」問到他會否參與其中拍攝？他有點賣關子表示：「唔排除我都會拍一個㗎，唔排除係fencing（劍擊）。」
李銘業曾中風半身癱
現年24歲的李銘業從小喜愛打乒乓球，多次獲得校制賽事獎項，名副其實是校內的運動健將，更曾以成為乒乓球運動員作為奮鬥目標，不過銘業於05年不幸中風，導致左邊身體癱瘓，不能再參加訓練，他坦言曾考慮放棄運動，幸而得到家人及朋友的支持及鼓勵，他慢慢康復，雖然行動不便，但並沒有放棄夢想，08年他再次拿起乒乓球拍，為做殘疾運動員而努力。
