今年中上市嘅內衣股都市麗人（2298）一直以性感代言人林志玲吸引市場注意，老闆鄭耀南噚日透露，計劃今年第4季賣埋童裝內衣。佢指，約有四成顧客已經成為人母，喺舖頭揀完自己個bra，可以順手買埋內衣畀仔女，一舉兩得咁話喎。
都市麗人𠵱家嘅男、女裝產品，分別由黃曉明同林志玲做代言人，公司會唔會搵番個級數有番咁上下嘅童星，代言童裝產品呢？鄭耀南就話，童裝系列喺第4季先推，未有咁快考慮代言人，暫時亦唔會創立新品牌；而產品將包括內衣褲、襪等等，價錢大概20蚊至100蚊人仔。
唔講唔知，公司開店係有策略嘅，每開一間新嘅女裝內衣店，都會特別喺旁邊開多一間男裝專門店，等男士同女友出街時，可以各有各揀冇咁尷尬，順便刺激男裝銷情。公司上半年開咗近500間新舖，總數超過6,200間。