體育用品股過去盲目擴張、賣貨，最後搞到市場頂唔順要爆煲，經歷近兩年漫長調整，安踏（2020）昨日終交出一份、分析員形容屬「無懈可擊」的業績，幾乎每一項財務指標都表現理想，盈利爭1億多就重上2011年高峯，股價更已回到pre-crisis前水平，成為首隻完全走出泥沼的體育股。前一哥李寧（2331）卻在市場有好轉情況下，搞到發盈警，即使撇開non-cash應收賬撥備唔計，營運上都要輸3億，近日仲痛失持續了12年的中國體操隊贊助，由安踏取代。
據悉，自國家體操隊接受贊助以來，都無所謂公開入標，因李寧影響力及人脈，基本上其品牌都是體操隊內定贊助商。今次體操隊公開畀其他品牌入標，據講李寧都有出價，但出手低過安踏；李寧知悉後，公司內部有人想加價（估係王子）但有人就唔准（可能係私募基金股東TPG）。最後李寧冇加價，贊助權落在安踏手中。
聞說這筆贊助費，對安踏來說根本唔算係乜錢，內部仲覺得好「抵」。反映甚麼？李寧去年底淨現金約2.72億，投資者擔心改革燒錢期要延長，李寧又要伸手攞錢的揣測，早已傳到一街都係。管理層早前在分析員電話會議，回應融資需要的問題時，以「這不是今次會議的討論範圍」來作答。呢個答案，實在是差到冇朋友。
海迪