微軟收購諾基亞手機部門之後，密密進行架構重組，諾基亞喺北京嘅手機廠房同埋研發中心要裁員4,700人，至300人。有消息指，為吸引員工自願離職，微軟用送手機做餌。
不過唔好以為係筍嘢，微軟只係送諾基亞Lumia 630，部機喺大陸賣800蚊人仔仲有找。而且，諾基亞智能手機嘅二手機市場有限，就算唔啱用想賣出去都有難度。
之前有網站整理近年擋子彈救主嘅手機品牌，諾基亞榜上有名，如果員工離職前想攞部機傍身都得，不過都要快手，因為每日限派300部。
其實微軟之所以諗埋啲咁嘅橋，係為咗安撫一眾員工。前幾日內地媒體話有近百名員工抗議，指微軟收購諾基亞初期承諾唔炒人，𠵱家裁員係違反承諾。不過，公司拎部手機出嚟就叫人走，會否令員工更火滾呢?