要講多話題性嘅內房老總，非恒大地產（3333）主席許家印莫屬，佢係鄭家純、劉鑾雄等本地大孖沙嘅鋤D腳；生意方面，佢亦多瓣數，地產、足球、銀行、礦泉水之外，新近傳佢計劃進軍乳業，準備喺奶業大展拳腳咁話。
傳率高層去內蒙牧場視察
有內地媒體報道，指許家印日前率領一班恒大高層坐私人飛機，飛咗去內蒙古，實地考察現代農業、牧業，之後仲會去埋黑龍江考察新項目。知情人士亦承認，許家印有此一行。
不過話明考察，係咪落實投資都係未知數，不過咁啱得咁蹺，早前花12億元人仔入股恒大足球隊「廣州恒大」嘅阿里巴巴創辦人馬雲，佢對乳業都好有興趣，上個月先至落實以20億元人仔養牛。唔通就係馬雲介紹呢條財路畀許家印?又或者打算有錢齊齊搵?
馬雲入股「廣州恒大」足球隊後，將球隊改名「廣州恒大淘寶」，有口痕友就話，如果雙方再度合作，唔知會否出產「淘(寶)(恒)大乳」呢?
恒大如果搞得成奶業，就要小心啲搵代言人喇。早前恒大搵嚟紅爆嘅《來自星星的你》男主角金秀賢做「恒大冰泉」代言人，就生事端；由於礦泉水標榜嚟自被韓國民族視為「聖山」嘅長白山，引起中、韓矛盾，不過廣告最終喺上月出街。
話時話，許家印雖然多搞作，但恒大股價喺過去五年多就認真麻麻，大部份時間低過2009年底上市時嘅招股價3.5元，噚日仲潛緊水。
李華華
mailto:[email protected]