大家都知我以財技分析成名，識用財技對捉股嚟講係好有幫助！新股上市後，最多人諗嘅就係賣殼！
新股IPO可以分主板同創業板上市，喺主板，大股東兩年後嘅股權先至可以轉讓，創業板喺6個月後，大股東就可以將小部份嘅股份賣走，但需維持原先大股東嘅地位，一年後便可全數賣晒。因為上市後個殼有價有市，所以好多公司都希望透過上市賣殼，散水或者等創造更高嘅價值！
豪特保健（6880）2011年上市嗰陣有好多聲音，認為呢隻股好大機會賣殼。上市後，股價同大家諗法一樣，向下炒，好有散水嘅感覺，難怪有班投資界嘅朋友，只係留意豪特買賣嘅感覺，而忽略咗豪特投資價值同發展！
目標價睇1.5元
馬拉人近年嘅收入越嚟越高，馬來西亞嘅房大，價錢更比香港平一大截，放一張大大張嘅按摩椅喺馬來西亞，比香港容易好多，所以豪特決定收購馬來西亞嘅OTO，加強豪特嘅業務規模。同時間對沖咗自由行下跌嘅風險，高明！
豪特為咗增加銷售量，以百貨公司作為分銷點，運用可攻可守嘅銷售模式，令短期收益更有效率同形態，繼續維持現時嘅銷售。
另外，產品替換期多數有兩至三年，所以豪特會以回收、翻新，以及將替換的產品送畀慈善機構，增加產品同現金流動性，同時，可增加消費者購買意欲，配合社企責任，為公司下一個發展做好準備。
Prof J寫豪特後，股價不跌反升，可能是因為我手風順，豪特保健現時股價有值博率，管理層開始為2014年擺陣，疑似賣殼事件令股價爆升，但成交量卻唔配合。
管理層話唔賣？有人即散水，但到咗1.03元附近卻有唔錯嘅支持。先以1.5元作目標價，睇吓基本因素嘅改變會唔會令呢隻股點燈先，繼續追蹤，出發！
徐燦傑
齊魯國際控股首席策略總監
本欄逢周四刊出