本人年幾前轉會用三星S4，作為一個鍾意自拍嘅港女，先發現原來iPhone相機有幾靚。至於兩部新機個芒都大咗，相信會吸引唔少人重回iPhone懷抱，都係時候mon實一堆蘋果概念股。近月資源股氣勢冇得頂，其中中信大錳（1091）連續兩日大反彈，單係噚日又升多4%。
中信大錳，股價有能力升得更猛！大家都知中信集團要借中信泰富（267）呢隻殼來港整體上市。多得呢個大計，中信大錳頭頂即時多咗個「重組概念」光環。中信集團一個企業踩幾多範業務，金融、保險、房地產、礦產、基建幾十個大行業，單係旗下上市公司已有13間。你搬屋時都會將屋企所有雜物分類再執過位喇，中信集團咁大間公司搬竇，重組是常識吧？其二，系內咁多間香港上市公司入面，中信大錳相對最細粒，最新約22億元市值。冇錯，公司近兩年業績都係蝕錢。不過睇埋旗下中信大錳礦業，今年首季蝕2,612.7萬元（人民幣．下同），比上年蝕4,673.4萬元情況好好多。近來資源價格升番，對公司業績會有改善。中信大錳又重組概念、又係而家當炒嘅資源股，但PB得0.7倍，真係唔多合理。睇埋股價啦，如果佢衝破0.78元阻力，下一個阻力1蚊，潛在升幅有三成，到時PB都係未到1倍，你話係咪令人心動呢？
Fifi
http://www.facebook.com/lovefrystock
本欄逢周二、四刊出