港交所（388）噚日舉行業績會，大家最關心當然係滬港通喺今年10月邊一日開通，行政總裁李小加嘅得力助手，即係環球市場聯席主管羅力冇畀答案，不過就伺機提提大家，李小加份合約仲有一年就到期嘞。
話說噚日李小加回答滬港通幾時開通，只畀些少貼士，包括係喺10月同埋會揀星期一，佢講完就問坐喺側邊嘅羅力有冇補充，對方十分認真咁話要補充一樣嘢，就係今年10月15號將會係李小加加盟港交所5周年，當日係星期三，滬港通一定唔會喺當日開通，話音未落隨即引來哄堂大笑。
睇番資料，李小加喺2009年10月中加盟港交所，2012年9月獲續約多3年，即係大約仲有一年，明年10月中就到期。過去幾年，港交所股價同業績一般，滬港通係咪靈丹妙藥，幫唔幫到李小加攞分，大家就要拭目以待喇。