職場上，唔少打工仔都好憎啲同事霸晒啲靚假期，但凡大時大節，都係佢先請假，毋須理會公司係咪多嘢做。政府內都有呢類人㗎，講緊嘅當然係特首梁振英，單係今年佢已經放咗5次大假，不斷外遊，難怪公民黨秘書處要將電影《失戀33天》海報，惡搞成《失蹤35天》（圖），電影英文名叫做《CY is not here》。
惡搞電影海報，擺明係戥忙到癲嘅政務司司長林鄭月娥唔抵，tag line係「梁特早已外遊十萬八千里外！林鄭只可留在政總範圍之內？」公民黨喺海報入面形容林鄭係「好打得動作女王月娥奶媽」，狼英就係「講大話唔眨眼演技男星689」，又批評佢8個月請咗逾30日假。