維達爾有暗病？大家咪心邪，只係講緊佢隻腳啫。智利教練森柏奧利踢爆維達爾遲遲過唔到曼聯，係紅魔新帥雲高爾擔心維達爾個膝頭哥有事，驚俾祖雲達斯搵笨，用4,700萬鎊（約6.14億港元）簽咗個病壞返嚟。
森柏奧利：曼聯好想要
現年27歲嘅智利國腳中場維達爾一直係曼聯嘅羅致目標，但搞咗成個夏天仲未有乜大進展，原因何在呢？智利國家隊教練森柏奧利就話係維達爾嘅膝傷，搞到曼聯十五十六。森柏奧利話：「我知道維達爾由祖雲達斯以約4,700萬鎊轉投曼聯嘅最大障礙，係雲高爾好擔心維達爾嘅膝傷未完全好番晒。曼聯好想要維達爾，但雲高爾就心大心細。維達爾喺今夏巴西世盃，只有佢喺祖雲達斯嘅3、4成狀態，雖然係咁，佢依然有好出色嘅表現。」
赴美兩周執1億港紙
維達爾喺5月初進行右腳膝頭軟骨手術，之後唞得1個月左右，就代表智利出戰巴西世盃決賽周。森柏奧利話：「其實，曼聯真係好想簽入維達爾，但雲高爾叫停咗呢單轉會，因為佢對維達爾嘅膝頭好有懷疑。」維達爾俾祖雲達斯列入亞洲之旅嘅28人名單，仲喺噚晚對印尼明星隊場季前熱身賽任後備。森柏奧利話，祖雲達斯同意以一個佢哋接受嘅價錢畀維達爾離隊，只要維達爾證明到佢嘅右膝經已百分百好番晒，雲高爾就會落「柯打」簽佢。
另外，曼聯禮拜二由美國返英國，據聞雲高爾好快就會公佈俾佢洗清嘅球員名單。至於佢哋喺花旗國兩個禮拜，並且喺洛杉磯、丹佛、華盛頓、底特律同邁阿密踢咗5場季前熱身賽，據報從出場費、獎金同電視轉播呢3方面勁執800萬鎊（約1.04億港元）。紅魔見咁好搵，會喺下年7月再進行美國之旅，並且喺紐約、達拉斯及芝加哥進行季初熱身賽。不過，雲高爾唔係好滿意入住嘅酒店同練習場地距離太遠，其中由比華利山酒店去玫瑰碗要成兩粒鐘車程，睇嚟曼聯要同主辦單位搞搞呢個問題。
