同好多大朋友一起成長、由叮噹叫到多啦A夢嘅卡通片，幾乎每年暑假都會有新戲上，今年上嗰套《多啦A夢：新大雄的大魔境—柏高與5人之探險隊》，截至前日上咗6日，票房有成285萬元票房，前日單日亦有34萬元票房非常唔錯。
《白髮魔女傳》僅收31萬
一套多啦Ａ夢仲贏埋同日上映、有「國際范」范冰冰擔正嘅《白髮魔女傳之明月天國》，《白》片條數真係幾令人失望，上映6日累計票房得31萬元，《多》片足足係佢九倍有多，甚至一日嘅數都多過佢。講真大家嘅古仔都係舊酒新瓶，估唔到國際范今次白髮輸畀藍色機械貓。其實同期上嘅仲有《銀河守護隊》（Guardians of the Galaxy）同樣截至前日累計已經有1,258萬元票房，而周秀娜同鄭伊健合作嘅新片《分手100次》計到前日已經有285萬元，都叫做有交代。
另外，多啦Ａ夢仲紅到去內地，前年喺香港展出嘅100隻公仔，今個月中會移師去四川成都一商場展出，特別嘅地方就係搵咗台灣五月天主音阿信，設計咗一款特別版同時展出，開幕嗰日仲請咗何韻詩做嘉賓。
撰文：馮仁昭