自從內地嘅虛擬電訊商（MVNO）開始營運之後，內地傳媒成日傳出呢班MVNO想向三大電訊商挖角，其中傳得最熱嘅，就係聯通（762）副總經理李剛。
市傳李剛被華翔聯信挖去做董事長已有一段日子，上月更加傳到國資委已經批准李剛嘅辭職申請㖭，聯通就一直未有正式公告。
直至噚日電訊盈科（008）公佈，李剛辭任非執行董事同董事會轄下薪酬委員會成員，咁就幾乎可以話係曲線證實李剛真係會離開聯通，皆因李剛係代表聯通母公司聯通集團入電盈做董事，𠵱家集團搵咗另一位副總經理張鈞代替李剛，華華有理由相信李剛今次真係同聯通講再見。
57歲嘅李剛係聯通歷來級別最高嘅離職高管，被外界形容係內地三大電訊營運商之中最出名嘅營銷大將，平日業績會都會同一眾領導現身，咁啱今日聯通中期業績會，李剛應該會同大家講聲再見卦。