前行政會議成員「梁粉」張震遠（圖）拖欠新利控股前獨立非執董梁志漢4,733萬元，俾梁喺高院申請破產單案，又有新發展。上次話張終於開始同梁和談，但噚日一開庭，梁嘅律師就話張只係還咗300萬元，要求立刻頒佈破產令，好明顯談判破裂。不過因為張嘅律師反對，聆案官將單案押後到下周一，等專責破產案嘅法官審理。
其實自從梁喺2月申請張破產，單案到噚日已經押後咗四次，同樣俾張拖欠3,000幾萬元嘅佳富達財務都嫌梁唔落力，忍唔住派大狀到庭，隨時申請取代梁打官司。至於張有乜理據反對呈請，噚日張嘅律師答唔到，只係話同大狀傾緊。下次開庭時，究竟張仲點拆招？真係拭目以待。
案件編號：HCB1223/14