【尋找香港的首爾】不少人第一次接觸的韓國電影，是一部1998年的溫情愛情小品《八月照相館》，但《狂舞派》導演、香港電影金像獎新晉導演得主黃修平(Adam)，比一般人都更早接觸韓片，早在1994年，他看了著名韓國導演李明世的作品《初戀》。
記者：鄒倩婷 攝影：李漢基
1994年，當年Adam只是香港中文大學藝術系一年級生，首次參與香港國際電影節，在文化中心欣賞了韓國電影《初戀》，「套戲係講一個女仔，情竇初開，暗戀老師，真係好有初戀嘅感覺，嗰種含苞待放、初戀嘅情懷，好逗人發笑。」 Adam坦言當年韓國的拍攝技術比不上香港，但他正正是欣賞該片的真摰和簡單。
Adam認為韓國電影業起飛後所拍的電影都「去到好盡，計得好準」，反映出韓國人的民族性，凡事力盡完美，極度嚴謹，「譬如《風塵三俠決戰地獄門》，好犀厲，一場喺荒漠嘅戲，三個主角係咁追、係咁射、係咁格鬥，好似將觀眾擺上過山車，十幾分鐘都唔放低，另一套又係導演金知雲所拍，叫做《我，看見惡魔》，我一路睇覺得好唔忍心，好肉酸！」
Adam不敢說韓片「去得盡」是好是壞，只是他個人認為過份追求完美，似乎少了層次感，「我係哈日嘅，睇日本電影嗰仲獨特嘅幽默感，似乎喺韓國電影搵唔到。」Adam發現普遍韓國電影的劇本都擁有超強邏輯性，難以跳出理性的框架，「港產片嘅癲喪係無譜，韓國嘅癲喪我覺得係有譜，譬如《食神》，谷德昭喺𨋢前痾屎，韓片可能過唔到好理性，超乎邏輯嗰關，所以去不到港產片嗰種唔理邏輯嘅程度。」兩韓專家、《韓瘋》作者鍾樂偉解釋，韓片要計算精準的原因，是他們以出口為目標，「外面市場鍾意啲乜，佢哋就拍乜。」
不過，Adam非常欣賞韓國人開放地吸收不同地方的優點，並非常認真地對待自己的作品，這態度值得全世界人學習，「我都好認真咁對待我自己嘅作品，所以我覺得《狂舞派》畀人感覺好有本土精神，其實都是自然流露出來。」
場地提供：BBQ 7080