商界提到反佔中嘅理由，要幾古怪有幾古怪。一向鬼馬嘅海洋公園顧問盛智文，噚日出席完「香港精神」活動，都話自己上禮拜六簽咗名反佔中，仲以資深活動搞手身份分析佔中有幾「可怕」。佢話自己成世人，無論搞海洋公園同蘭桂坊，都要做人流管理，但係經驗話佢知，好多情況係搞手控制唔到，尤其當大批人聚集，大家又情緒高漲，就好容易失控，好易出事，而佔中三子唔及佢咁經驗豐富，睇死三子點強調「愛與和平」都隨時失控。
佢又話，好同意普選對香港好重要，但係佔中點都會對香港聲譽有損，如果太心急，隨時由幫港變害港，作為沉默的大多數係要發聲反佔中。佢仲好樂觀咁諗，香港地乜都有得傾，大家可以坐埋唔啱傾到啱，北京政府始終冇搞過普選，今次係一個大實驗，如果北京見到香港人成熟，深信政改以後可以行多好多步，叫大家點都要「袋咗先」。盛智文響海洋公園搞哈囉喂「嚇鬼人」有聲有色，之但係今次「嚇鬼」佔中得唔得，大家拭目以待啦。
講番一班商界搞嘅香港精神，已經成立5年，今年就搞咗個「正在製造」活動，發掘香港製造嘅故事。頭炮嘅免費刊物就搵咗紅A第三代掌舵人梁馨蘭、頂尖度身訂做男裝品牌詩閣（Ascot Chang）張宗琪父子，介紹佢哋made in HK嘅故事。