等海洋公園大熊貓盈盈樂樂生B等到頸都長，好在仲有北極狐嘅肚皮夠爭氣。嚟自美國嘅爸爸Gochi同漁護署充公嘅中國美女Mochi一見鍾情，譜出異地情緣，今年6月仲一口氣生咗6隻「混血」B，隻隻B都冇時停，好似全身灰毛嘅「黑妹」最鍾意玩石仔同樹枝，可愛到痹！
盈盈樂樂9歲慶生食蛋糕
海洋公園海洋哺乳動物高級監督陳展邦（Eddie）話，初時擔心冇喺野外生活過嘅Gochi唔識湊仔，點知Gochi原來係超級好爸爸，寧願自己唔食，都要將所有食物平均分配畀6個仔女，如果其中一隻B匿埋一邊，仲會特登拎隻老鼠過去餵佢，父愛爆燈。北極狐好好生養，每胎最多生25隻，但Eddie話添丁要慢慢嚟，暫時會畀Gochi食避孕藥。佢仲畀貼士，話北極狐大得好快，想睇得意BB樣就要把握時機喇！
喺海洋公園出世嘅樽鼻海豚Mia都湊熱鬧生B，囡囡Milo好黐身，兩母女形影不離，有時仲會互相磨擦背鰭。至於大熊貓盈盈樂樂轉眼已9歲，海洋公園準備咗個以蔬果製成嘅冰雕蛋糕慶祝，盈盈又聞又摸玩得好開心，最後一掌拆解蛋糕，坐低慢慢享受佢至愛嘅蘋果。今年園方第四次幫佢哋人工授精，但懷孕機會似乎微啲，海洋公園陸生動物部高級館長祝效忠（Howard）話唔使擔心，事關盈盈樂樂仲好後生，而且經歷過四個繁殖季度，將來更易成功孕育港產大熊貓。
另外，海洋公園7月入場人次達85萬，為歷年最高，8月入場人次仲有望破百萬。而原本今年底開幕嘅樹熊館將延遲到下年初，萬眾期待嘅樹熊亦會稍遲來港，Howard話同樹熊嘅健康無關。
李八方
mailto:[email protected]