中共於七月廿九日宣佈正式立案調查中央政治局常委周永康，之前已雙開或雙規了一大批周永康隨員，包括政法幫、四川幫、石油幫、秘書幫等等，今次又株連周永康家族，可說將周永康勢力連根拔起，再計埋以前清除咗地方紅員薄熙來（與周永康眉來眼去），拉咗前中央軍委副主席徐才厚落馬，可知習近平已經完全掌控局勢，大權在握，有毛澤東影子，其餘六位中央政治局常委只係佢嘅聽話助理。
初步揭露周永康幫貪財九百億元人民幣，數目驚人。2008金融海嘯之後，溫家寶宣佈中央撥款四萬億元人民幣救市，大搞基建，當時已有人講過，可能會有十分一（四千億）流入官員口袋，哦，淨係周永康一幫已知有九百億元（可能收埋更多），然則四千億元歸私，可能噏少咗咯，唔怪得內地富豪越來越多啦，越來越多人鍾意中央政府刺激經濟啦。
大有大貪，小有小貪，美國福喜食品公司之上海分公司出事，售出不少過期劣質肉類產品，累埋麥當勞、KFC及日本Family Mart，於是內地政協乘機大罵美國公司缺乏誠信，缺乏道德，沒有道德底線。福喜母公司叫做OSI（Otto & Sons Inc.），二十世紀之初由德國移民在芝加哥近郊創辦，因第三代無意繼承，約二十年前先至賣盤俾一位財務董事。麥當勞在1955年開始在美國全面擴充，就與OSI簽訂長期肉類供應協議，故此麥當勞今次雖然碰壁碰到一面灰，但仍然與OSI不離不棄，不會斷絕關係。OSI宣佈清除中國管理團隊，由美國派人到上海調查，你話一個唔好彩，查出係中國人伙計吃裏扒外，私底下收埋啲靚肉自己去賣，公司按合約供應嘅就係過期劣肉，咁就杰咯，到時內地政協唔知要點樣解畫。英國藥廠GSK嘅內地貪污案涉及英國人（中國區）、內地銷售高層（中國人），搞到一鑊泡，OSI個案大有可能同出一轍，即是錢銀女色害事，好合乎今天中國國情，上有周永康，下有OSI，何足為奇？麥當勞係受害人，誤信OSI呢位長期盟友，可算吃了眼前虧，至於香港麥當勞嘅公關自殘，係另一回事。罵麥當勞賣爛食物不要罵得太狠呀，到頭來好可能又係涉及中國人嘅中國式貪腐㗎！