康宏理財（1019）主席王利民一向鍾意扮鬼扮馬，為支持正生書院改善工程，公司出資過百萬元冠名贊助「康宏圖騰跑2014」慈善籌款活動之外，佢本人亦扮埋「生番」幫手宣傳。今次嘅目標係為正生書院籌款700萬元。
王利民解釋，今年4月參觀過正生書院，破舊嘅院舍令佢感慨良多，決定為呢班戒毒青年施以援手。至於今年10月4日會否落場跑埋一份，佢就未決定，雖然佢跑過沙漠同埋北極馬拉松，身經百戰，但今年3月，佢喺本地參加區區10公里賽事，竟然跑傷，膝頭軟骨裂開；由於佢下一個目標係明年1月去南極跑，所以可能都係先養好傷為妙。