上季可以話係練馬師胡森嘅黑暗歲月，全季贏得13場頭馬，差兩場先達標，家陣養馬量跌到得18匹，真係少得可憐，好多馬迷都認為佢今季成績再肥佬嘅機會極高。其實又唔使咁悲觀，記得姚本輝都遇過類似情況，05至06馬季贏得10場仲悽慘，亦一度同樣養馬只十零隻，但翌季好彩靠短途馬王「蓮華生輝」崛起五捷，帶挈整個馬房反彈，埋單贏24場，至今多年一直順風順水。
咁今季邊隻係胡森嘅救亡馬呢？好多人話係「索咖啡」，上季一戰新馬賽即勝，過程只比晨操辛苦少少，擺明有高質，不過三歲馬現評67分插三班唔算低，想多捷唔係話咁易。反而有匹已七歲，表面上係衰馬嘅「歡欣滿載」，可能救到胡森一命。
點解咁講呢？呢匹馬前季曾喺三班大勝「安賞」兩馬位，上季「安賞」兩勝級際賽，兩次蹄下敗將包括「將男」、「事事為王」呢啲一級馬，所以「歡欣滿載」冇可能係水馬，但「歡欣滿載」偏偏嗰場之後狂輸25場，家陣跌到五班30分，其實上季尾佢曾經跑第三，已有復蘇迹象，如果今季全面反彈，就算贏四場每場加7分，都仍係58分四班馬隨時可再贏，胡森能否達標，就算睇呢匹衰馬能否大翻身了！