全城街馬又嚟喇，繼今年3月跑完九龍東，10月4號將會升呢跑上大帽山，幫基督教正生書院籌700萬元，興建三間臨時屋。搞手梁百行話第一次搞山野賽，賽事分57同16公里，9月7日截止報名。選手可以係賽前化「野人」妝，打氣點又會擺設薯片山、各款生果同杯麵，唔使次次咬麵包同食蕉咁悶喎。完成賽事後，會喺大帽山郊野公園舉行圖騰派對慶祝。
正生書院校長陳兆焯話，書院係由養豬場改建，四面冇牆，每逢打風都好狼狽，2012年試過成塊鋅鐵皮屋頂被刮起，暴雨浸壞晒啲電器。佢希望新院舍可改善師生生活環境，「有個廁所、有個廚房，生活得合理啲」。