近幾日恒指橫行，成交少番啲，技術上係整固，但港交所（388）同安碩A50（2823）所謂整固原來係升慢啲咁解，一路向北做旗仔，跌都唔曉跌。噚日有四大行上月存款流失1.5萬億元人民幣，加上服務業PMI數據差勁嘅壞消息，前排累積升幅咁多，但而家想跌一吓都唔得，恒指全日照升48點。前排連美股單日跌超過300點，港股都保持金剛不敗身。種種迹象顯示，市底係幾咁厲害。
恒指9 RSI前排升到87樓上超買水平，反映市場已升到非理性階段，而RSI回落至接近70就似乎有築底迹象，而家係等下一輪短線升浪幾時撳掣。當大家以為升市原因係外資基金湧入中港股，晉佳就偏向相信近期由外圍流入香港嘅熱錢，唔少係近幾年由內地從特別途徑流出去炒美股嘅大陸錢，大家可以觀察到港股炒法似係大陸模式多過外資基金模式，唔通港交所升到呢個位，高盛講到未來10年港股成交增加4倍先至講得通之下，外資long fund仲會對港交所有興趣？
君不見A股創業板一百幾十億甚至幾百億元市值嘅股，都可以唔睇基本因素當殼股炒，一隻2,000億元市值，但全世界只此一家嘅港交所，話知你估值有幾癲，一樣照掃。因為大陸佬變銀紙出嚟實在太easy，買Rolex、Hermés可以唔使睇價錢，只要佢哋主觀意願覺得件事有價值，使錢使得爽快冇手尾跟，咁樣買你隻港交所又點識嫌貴？至於某啲大陸錢有思鄉病，無啦啦愛國愛黨上身，一時三刻翻手唔切買A股，咁點算呢，咪湧晒去安碩A50先算囉。
大折讓H股隨時再喪炒
其他概念股已進入忘我狀態，唔好同我講第一上海（227）基本因素點樣唔得，7月到而家升足九成俾你睇。喺美國炒咗幾年嘅熱錢，今勻回流翻炒中港股，當係最後晚餐定宵夜定係甜品都好，一次過谷埋一兩個月同你掃貨，購買力就已經非同少可。
呢一轉第一上海亦示範咗乜嘢叫做如入無人之境，一樣係睇唔出基本因素有乜咁好嘅大折讓H股，照計仲可以有多轉吧。唔少人講浙江世寶（1057）深圳A股上市，唔關滬港通事，但前排炒得最勁係佢，噚日大折讓H股有番異動，升得勁嗰批又有佢份，呢啲正反映強國人不拘小節嘅性格，你搭港鐵時係唔需要忍佢哋，但入到港交所大賭場，始終邊個多錢就邊個話事。咪理第時大陸信貸點樣爆煲法，呢一刻成間港交所俾大陸佬搬去葡京玩，落得場個袋有錢嘅，個個都係郭美美，唔會同你坐底慢慢計PE先落注，咁就唯有跟人哋玩法，最緊要係你早過佢哋落注，然後再早過佢哋割禾青便行。
晉佳
本欄逢周三刊登