美國財經名人不時拎自己嘅時間出嚟做慈善拍賣，最出名當然係股神畢菲特每年一度嘅午餐競投。美國慈善拍賣網站Charitybuzz近日亦拎Google主席Eric Schmidt半粒鐘出嚟做慈善拍賣，價高者可以去Google位於紐約市嘅寫字樓參觀，跟手同Schmidt坐低飲半粒鐘咖啡傾偈。
呢個拍賣𠵱家叫價去到1.05萬美元（8.19萬港元），仲有大約10日先至截止，意向價係籌到5萬美元，籌到嘅善款主要捐去幫助基層青年發展藝術興趣。
網站舊年舉行同類拍賣，競投激烈，價高者以61萬美元（約476萬港元）獲得與蘋果行政總裁庫克（Tim Cook）飲咖啡嘅機會。
要講身價高嘅財經人當然係畢菲特，佢今年嘅午餐慈善競投，就以1,690萬元成交。