Le Saunda老闆、鞋王李子彬間公司利信達，早排公佈業績盈利急升，李子彬自然亦豬籠入水，有更多彈藥買入靚馬。而已在港上陣的旗下馬中，不敗之師「兵威振」上季尾傷癒久休一年復出照贏，李子彬回憶當日賽前非常緊張，但練馬師賀賢向佢大派定心丸，表示「冇馬夠佢跑，放心啦！」，結果真的贏了。李子彬話衝線一刻無比興奮，「執金都冇咁開心」，因為咁好鬥心的馬，1000萬都買不到。雖然「兵威振」贏馬後又扭傷腳，但好彩只是小事，今季更一早已開操。
李子彬養馬第一駒係93年「亞洲光榮」，他幽默地說：「我交咗20年學費，現在才明白購入質高自購馬才是最『保本』方法。因為根據馬會資料，二班賽或以上的獎金，佔了各班次總獎金達七成之多。唔少大賽獎金更逾千萬，無疑貴馬唔一定好，但平價馬能躋身級際賽，比例始終較低，所以我願意斥資買貴馬主攻大賽，計落更着數。」
李子彬又話對烙號T048嘅法國自購馬Got Fly充滿期望，佢指Got Fly在法國四戰得三冠一亞，曾勝出2000米表列賽，一心以明年香港打吡為目標。未來亦不會再買中下班次馬匹，最怕名下馬匹質素平庸，末段追極都追不到對手，就會好冇癮喎！