趙世曾講起愛女趙式芝接班就笑咪咪，但係一講到旗下荃灣油柑頭一號九龍山頂項目，申請7年都未獲發預售樓花同意書(俗稱售樓紙)，佢就嬲爆兼連珠炮發，指呢件事係「破世界紀錄」嘅「香港大笑話」，促請梁振英政府徹查。
指香港管治不及回歸前
趙世曾話，早於2007年5月為項目申請售樓紙，同年12月已經獲發入伙紙，但係到咗7年後嘅今日，地政總署一直拖延唔發售樓紙。
被問到事件會否涉及政治因素，佢就話「我不與人為仇，亦不與政界有任何關係，更冇得罪任何政界人士。」但暗串有人可能想利用拖慢工程，當係自己功績，又大彈香港管治水平不及回歸前。
翻查資料，卓能喺07年為一號九龍山頂向地政總署申請售樓紙，其間因70棵樹木嘅保護問題，遲遲未獲批出，卓能後來與政府達成協議，每棵樹賠償20萬元，共賠過千萬元，另加補種樹木方案，但至今依然未賣得樓。