今日，阿怡同我講分手。
「你呃我，我哋分手啦。」三個月前，我喺飯局識咗阿怡，我當時第一次凝視佢嘅瞳孔，我覺得係世界上最靚嘅。冇幾耐，我哋拍拖，自問呢三個月以來，對阿怡知無不言，言無不實。「你係咪有咩誤會？我真係冇呃你。」
「仲話冇？你呃完我你係揸波子，之後又呃我你住豪宅！原來全部，係全部都係大話！」波子？豪宅？咪住先，呢啲都有得呃？呃到嘅我都想知點呃呀。「喂，你唔好走住先，聽我講…」「我唔聽呀！我唔聽呀！」「Stop！你要分手都搵個好啲嘅理由，唔好屈我呃你！」
「我屈你？！」阿怡終於止住腳步，轉身面對番我，連珠爆發：「當日第一日識你，我明明見到你拎住條波子車匙。點知原來唔好話波子，你連單車都冇架！」
佢講嘅車匙，應該係我當日貪得意，喺淘寶用39.9人仔買返來。「嗰條匙，我唔係諗住買番來呃你…」正當我嘗試解釋時，「咪住，你係咪因為嗰條匙，你先埋我身？」
「我對你好失望，將我諗到膚淺？依家問題係你呃我呀！」阿怡講呢句說話前，眼珠碌咗去右邊，反映佢當時用梗左腦，而左腦主要係負責創意方面。我開始嬲，「係你自己一廂情願以為我有波子，咁又係我錯？」
「咁啲相你點解釋？」又咩相呀？我成世仔，唯一唔見得光嘅相，就係以前一系列咀落女神周慧敏Poster嘅痴漢相。阿怡繼續，「我嗰日同你講電話，你話你當時喺屋企花園，我仲叫你影花園個景俾我睇，你影咗啲咁嘅相俾我。」
阿怡向我展示手機，見到由我屋企大廈望落去，居高臨下，飽覽180度葵芳全景相。冇錯，能夠住喺半山，係我成世仔最自豪嘅事。冇錯，畏高係整定，但我就算腳震，仍每日行出呢個空中花園影好多Chok相，呢個係我嘅堅持，因為我覺得呢個係住半山嘅福利。
「我屋企真係咁，邊有呃你？」我答。「James，你就係咁，你永遠都覺得自己冇錯。你明明就係住公屋，公屋呀！分明就係誤導，你誤導我你係住半山嘅有錢仔！」
誤導？女人就係咁，主觀願望永遠凌駕理性思考，你想知我住邊，咪問囉！自己估錯就怪人，「我誤導？近來啲新股夠成日誤導我佢係好嘢，最後主席喺IPO錢袋袋平安後就走佬，咁我可以找邊個晦氣？我係住公屋呀，葵聯邨呀，公屋王呀，你識唔識？每三層就有一個空中花園，冇花冇假。千幾二千蚊就租到個冇窗台、間隔四正實用、冇漏水嘅單位。真正蔗渣價錢，燒鵝味道。呢幾個月交完租，養埋屋企，送埋Prada、Gucci俾你，我仲有錢儲，住公屋有咩問題？」
「你唔明我。幼稚！點解你仲係咁唔成熟。」「講到尾你都係嫌我住公屋，嫌我唔係富二，睇唔起我啫。」「我哋思想唔一致，分手吧。」
點解女人咁鍾意話人幼稚，係咪睇得太多《那些年》。點都好，嗰一刻，我再一次凝視佢嘅瞳孔，我先見到瞳孔入面嘅，原來有無限個Dollar Sign，我頓時醒覺。我走近佢，從褲袋拎兩條車匙出嚟，「呢一條係波子嘅，冇錯，係玩具；至於呢一條法拉利，係堅嘅，新買。」冇錯，唔係富二都可以發達，一要多謝層公屋令我儲到錢，二要多謝呢期啲殼股升咁多。
完
by千頌C@堆填區
http://www.facebook.com/winbigwok