原生態牧業（1431）已經有半年盈喜打底，嚟緊日子，食住雙生孩政策，同內地乳品依然勁偏低滲率，原生態繼續肥仔水，而家陣預測PE，得6倍，勁抵買。
原生態啱啱公佈冇耐，嚟緊上半年，純利會激增140%，計計數，今年半年純利上到2.4億元人仔，已經超過上年全年純利2.2億元人仔。
又內地毒奶粉事件，阿爺銳意整頓乳品行業，唔夠班嘅要早唞，隨住阿爺去蕪存菁，原生態作為第四大原料奶生產商，已經有運行。
估值平同業一截
又雙生孩政策今年陸續喺各地區推出，去到今年5月底，即係推出初期，內地已經有24萬對夫婦通過申請。呢個政策出爐，對包括原生態嚟講，已經畀到產品額外需求。
而家內地成個奶品產業，講緊人均年奶品消耗，只得先進國家人均值三分之一，滲透率仲係好低。加埋原生態奶品，又係供應畀蒙牛（2319）等龍頭企業，上家有品牌優勢，成個內地市場，仲有大把空間發圍，原生態掂晒！
係咁意計數，原生態今年下半年純利，同上半年睇齊，全年純利4.8億元人仔，純利翻一番，又明年度純利增長30%咁大把，今、明年度預測PE得8倍同6.4倍。
場內行家，明年度最平PE，都講緊近9倍，龍頭蒙牛，係講緊22倍，原生態平咗一大截。
原生態上年11月上市，當時，大佬蒙牛做咗基石股東，認購原生態1.72億股。原生態現價（1.29元）比起上市價2.7元，潛水潛咗過50%，家陣仲抵搞。買原生態，當追番上最近磅行家9倍PE，講緊要升近40%到1.8元，呢個PE水位，未有耐追到行家平均17倍PE。
錢雋
細價股專家
本欄逢周二、三、五刊出