中電（002）企業發展總裁莊偉茵（Quince）細路仔嘅時候原來差啲放火燒屋。佢噚日應邀出席香港社會發展回顧項目與美荷樓生活館首度合作嘅活動，擔任口述歷史嘉賓，向30多名女童軍細說那些年。
話說Quince嘅公公婆婆曾經係大坑東徙置區居民，佢記得以前徙置區嘅公廁經常遍地「黃金」，即係便便，稍一不慎就會中地雷，加上冇燈光，出入必定要點蠟燭照明。
講起蠟燭，佢自爆，有一年中秋節同哥哥膽粗粗喺屋企點蠟燭玩，點知家人突然返屋企，佢一時心急想毀滅證據，竟然隨手拎起羊毛被包住蠟燭，好彩火勢冇蔓延開去，否則就會燒咗成間屋。佢兩兄妹事後當然俾家人打到開花喇。