木薯（841）上年度喺泰國政治的緊張局勢下，純利都大創5年新高，家陣局勢穩定咗，加埋尤其內地對環保同糧食的龐大需求，木薯呢家泰國木薯片嘅出口龍頭，今年仲肥仔，得3倍超低PE，勁吸引！
木薯係泰國最大木薯片嘅採購同出口商，兼亦係內地最大產品進口商。集團啱啱派咗上年度成績單冇耐，純利係一枝箭飊升咗2.8倍，到1.2億元，創五年新高。仲要咁睇，喺木薯下半年度，泰國政局緊張，但呢期純利7,440萬元，仲要比上半年度4,234萬元好。
大戶隨時掃甩轆
踏入本年度，泰國政局已經緩和，啱啱對上嘅6月，泰國農業等出口值，就同比增加3.5%，主要就係包括木薯等農產出口增加，木薯已經有運行。又中、泰關係良好，上年11月，泰國商務部就同內地北大荒簽訂進口九萬噸木薯條。而內地喺上年兼超越日本，成為泰國第一大貿易夥伴國。
內地呢邊，喺糧食安全國策，加埋阿爺推動環保，未來兩年，會有多間生產乙醇廠房落成，木薯預計，將對木薯產品起更大需求。
成個局好清晰，第一大貿易夥伴中國，唔止人情牌，對木薯產品，係有勁大實質的需求，木薯又係泰國龍頭，何止掂過碌蔗？
輕秤啲計，木薯本年度純利1.5億元，增長29%，計埋上年配股攤薄喺今年全面反映，預測PE都係得3.6倍。又木薯上年配股前，真係散客街貨，得1.32億股，現價（1.18元）等值1.6億元咁大把，求其一個大少少嘅機構投資者，已經可以掃到木薯甩轆。
買木薯，當上到兩蚊計數，係要升65%，PE都係得5.6倍。
錢雋
細價股專家
本欄逢周二、三、五刊出