練馬師姚本輝今季首次露面，呢一日(4號)好早就到場打點各駒操練事宜。姚本輝透露上季煞科後，與家人去過台灣旅遊，回防後當然要專心處理廐務，尤其大哥大洪金寶名下的「崇山寶」，這匹短途名駒上季在港兩次跑直路賽，都贏至少兩個馬位，三月底更揚威杜拜阿喬斯短途錦標一級賽，至今已缺陣四個幾月，究竟家陣健康狀態如何呢？
姚本輝說：「『崇山寶』經過休養生息後，如今一切都令我滿意，10月1日沙田1000米直路賽國慶盃，以及明年1月25日速系列首關同一路程嘅百年紀念短途盃都是目標所在。暫時會主攻直路賽，但同時會訓練牠再次嘗試跑轉彎賽，未來向1200米發展。」
講番10月1日國慶盃，既係新一季首場級際賽，亦可以話係未來短途馬王嘅前哨戰，因為除了「崇山寶」，估計另外兩匹年輕短途怪獸「神舟十號」、「兵威振」亦會出戰國慶盃，一定刺激到暈。不敗雄師「兵威振」直路賽曾跑出55秒49，係現役馬中此程最快時間；而「神舟十號」則六戰直路賽五冠一季。表面上「崇山寶」高達122分實力似乎高一截，但要留意國慶盃係讓磅賽，「崇山寶」要負重磅，屆時將面臨服役以來最大挑戰。