一如市場估計，諾奇（1353）老闆丁輝捲款潛逃，點會只是「大股東的個人行為」咁簡單？公司上周披露，原來丁輝在1至4月期間，共分四次調走公司合共2.85億元款項，佔IPO集資額逾九成。資金調動竟然咁兒戲，諾奇CFO、董事會及核數師安永，實在責無旁貸。
有業內人士形容，核數師審核上市公司業績時，如果執正來做，理應要睇晒報告期內、以及其前後的資金流進出情況，抽唔同時段睇吓公司銀行賬戶係咪真係有咁多錢。如果核數師偷懶，就只會check年結當日的戶口結餘，中間啲錢流咗去邊？佢哋唔會理。據講，有核數師曾因應民企胡亂調動資金，要求公司開網上銀行戶口，好讓核數師隨時遙距check數。證明有心做，仍有方法可降低公司出古惑的風險。
至於CFO，但凡公司有大筆資金調動，均必須CFO簽名批准。竟有資金可離奇消失，一係就CFO有份夾埋，一係呢個CFO就係「假」的。唔少民企的所謂CFO，其實只是搵個持牌香港人來掛名，實質盤數另有內地總部人士「揸fit」。海迪見過最「誇張」的CFO，是IPO前幾個月才聘請，30歲唔夠，連公司P/L都未解釋得清楚。曾有CFO任職三間民企都出事後，連環跳船，近日又在一工業股中「復出」。可見市場對此類CFO的需求，仍然相當「殷切」。
海迪