機管局前行政總裁許漢忠（Stanley）上月中正式離開機管局，大家都好關心佢嘅去向，事關業內一直盛傳佢會繼續留喺航空界，而本港航空公司得幾間，喺未有呢方面嘅消息之前，許漢忠就決定去幫阿哥許照中，做六福金融顧問。
許照中噚日接受查詢時，承認搵咗細佬Stanley幫手，佢坦言呢個安排係「掛名」，多番強調「冇乜特別」，佢主要想利用Stanley喺商界嘅人脈，幫手介紹多啲商界朋友畀公司認識。話明係顧問，Stanley只係得閒先至去幫手，佢話六福金融本身都有十幾名顧問，成件事都係好正常咁話。
至於Stanley今次係咪過冷河性質？許照中就好機警咁話，唔清楚Stanley跟機管局份合約點寫，亦唔知對方遲啲有乜去向。顧問費幾多呢?佢就話無可奉告。