上周已從歐洲回港的大摩，呢一日(4日)露面親自督操，佢話今次去過歐洲多地物色良駒，睇中咗幾匹馬，可惜部分未能通過獸醫檢驗，仍須繼續努力，為馬主搜購佳駟。佢又透露自己來去匆匆，周二(5日)就會前往澳洲，為剛在當地開倉的弟弟摩加利打打氣，以及探望自己名下愛駒「耳邊風」。
大摩用人向來精明，但亦都愛恨分明，就算強如冠軍騎師潘頓，上季因為搏輸「軍事出擊」，自從1月19日董事盃之後，已經畀大摩拋棄，再冇合作。表面上今季大摩會繼續重用一直關係良好嘅莫雷拉，上季兩人攜手攞到12Ｗ，最重要勝仗當然係「步步友」奪經典一哩賽；但大摩點會為一顆樹放棄一個森林。呢一日佢就話到明有兩個新歡，就係兩位新任公司騎師，澳洲好手羅理雅和意大利猛男艾兆禮。
大摩話羅理雅是三屆悉尼冠軍，在澳洲成名已久，彼此早已認識，相信他在港會取得不俗成績，今季將倚重佢同莫雷拉搏殺。而大摩雖然唔識艾兆禮，但有看過佢上陣片段，肯定是騎得之人，加上年紀輕輕活力十足，所以願意支持。
羅理雅牌照有效期由9月21日至明年1月21日，合共四個月。至於年僅23歲的意大利新星艾兆禮，則首次來港上陣，11月15日才開始履新。